港股IPO今年失三甲 明年或靠中概回流大翻身
12月10日，天晴，日間氣溫略為回升，天氣相當乾燥。美股連彈幾下勁之後，隔晚反覆偏軟，道指幾乎無變動，跌唔夠1點；標指跟納指分別跌33點及269點。今晚美國將會公布11月CPI，市場正觀望呢個數據，因為可以反映通脹情況，亦係聯儲局貨幣政策重要指標。市場預期美國CPI年增鍳率或升至6.4%，進一步高於10月份時6.2%的31年以來最大增幅。
日日都有唔同大行發表對美股後市睇法，最新鮮熱辣係摩通預期，喺高疫苗接種率及新療法下，明年經濟將從疫情中全面復甦，預期明年底標指目標可達5050點。由於全球流動性加快，消費強勁將會帶動經濟表現。不過細摩亦警告，疫情帶來嘅經濟挑戰明年持續，包括各中央銀行收緊貨幣政策、歐洲及亞洲之間嘅地緣政治角力、高通脹，及能源危機等，將為市場帶來不穩定性。
細摩都仍然睇好美股後市表現，不過美銀就無咁樂觀，美銀表示經通脹調整後，標指成分股嘅實際盈利收益率(real earnings yield，即盈利除以股價，再減去通脹率)已跌至負2.9%，係2000年科網泡沫爆破以嚟首次進入負數區間。美銀更警告，過往4次實際盈利收益率低於零時，美股即見熊蹤。
美股表現愈趨波動，缸邊友開始習慣，至於港股反彈之路困難重重，主要係缺乏成交配合下，港股向上爆升動力有限，資金只係喺唔同板塊之間流動，未見再有資金流入，港股收復24000關後能否企穩，仍有待觀察。
過往幾年，港交所(00388)一直係穩坐全球新股集規模三甲位置，但自從去年11月螞蟻集團上市計劃被阿爺刹停後，港股IPO表現每況愈下，今年更恐怕三甲不入，畢馬威中國預期今年集資總額更由原本不少於4000億元，下調至3560億元左右。
除咗阿爺監管嚇怕投資者，令中資企業紛紛押後上市計劃，又或縮減集資規模外，美方對中資企業亦窮追不捨，有消息指今日戈IPO截飛嘅人工智能(AI)獨角獸商湯科技(00020)躺著也中槍，被美國財政部列入「中國軍工企業」黑名單。受到內外夾擊，中企赴美上市難度增加，不過中概股有可能陸續於美股退市，回流港股上市，或有利明年新股市場發展，。今年港股由第一季頽到年底，唔少缸邊友更棄港投美，集中炒美股，不過古天后相信物極必反，明年中概股回流港股，除咗可以谷翻起個IPO市場，有機會由中概股帶動，炒翻熱港股氣氛。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。