年結股仔mark價急升勿跟車
隔晚美股創新高後回軟，相反今日港股喺期指結算日做好，恒指重返超過一個月高位，但半日受制二萬七關。恒指高開126點，早段升幅曾縮水至102點，見26670點半日低位，之後重拾動力愈戰愈勇，盤中一度升430點，見26998點半日高位，僅差一步見二萬七，創11月27日以來新高。恒指中午收報26917點，升348點；國企指數報10599點，升150點；恒科指半日升216點，報8214點。半日成交801億元，臨近長假期都算係咁。
藍籌股中有四個成員今日齊齊破頂創新高，全部都係阿Man曾經推介過嘅優質股，包括長線組合內嘅鐵腳港交所(00388)；今年批股N次，但愈批愈升，愈升愈有嘅藥明生物(02269)；落選藍籌多次，終於守得為開嘅新貴安踏(02020)，以及內需股投資組合內中不可或缺嘅蒙牛(02319)。講到內需股，喺上個月開，阿Man已不停推介內需股，皆因部份資金從累積升幅已巨大得驚人嘅新經濟股中流出，買入受惠內循環政策嘅內需股，今日多隻內需股創新高。喺內偱環同需求供給側政策下，預期明年上半年內需股仍然會熱炒，若然閣下仲有貨喺手，大可坐定笠六唔急食糊。
龍頭科技股繼續反彈，騰訊(00700)揚4.7%；阿里巴巴(09988)再飆5.8%，為升幅最大藍籌；京東(09618)彈高4%；美團(03690)揚4.5%；小米(01810)升0.2%；京東健康(06618)微升0.5%；JATMX喺阿Man嘅長線組合內都無郁過，只係早兩日風頭火勢，未有撈貨，不過阿爺嘅心意難測，真係唔知幾時向邊個開刀，暫時都係坐住啲平貨底，要買貨都係等政策風險減退再考慮。至於上升兩星期已炒高幾個開嘅京東健康(06618)，講咗接近200元乜嘢利好因素都反映咗，北水再買嘅貨亦齊，暫時係有波幅，無升幅，半日僅升0.5%，相反對手阿里健康(00241)彈高6.9%，相對之下，阿里健康又真係落後得緊要，只不過掛住阿里個牌頭，老母捱沽，阿仔都好難避過一劫。
唔係阿Man要睇死內地電訊股，事實係內地5G喺海外發展受多國圍堵，仲要部份公司被美國制裁，又點會有運行，今日升市呢個板塊都要逆市下跌，聯通(00762)係表現最差藍籌，半日跌3%；中電信(00728)跌4%；中移動(00941)跌1.7%；被缸邊友恥笑為中國跌塔嘅中國鐵塔(00788)則無升跌。
嚟到年結日前夕，唔知大家有冇留意呢幾日好多平時靜過鬼嘅股仔忽然抽升，提提大家呢啲忽然抽升嘅股仔，逢係年結之前都會整色整水推高股價，原因係唔少股仔都押咗股，為免年結被追收持貨差價或追孖展，呢啲股都會失驚無神mark高個價。大家見到呢啲股千祈咪心郁郁，多手諗住搭轉順風車，上錯賊車一過咗年結，你想落車都逃生無門，謹記便宜莫貪。
由於明日半日市關係，【盤房來料】一如過往半日市會暫停一日，依家先同大家講定新年進步，祝願2021年疫情快快過去，經濟復甦，股市維持暢旺，明年勝今年。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。