美股PE高 鮑威爾派定心丸
12月18日，早上清涼，日間部份時間有陽光及乾燥，周末期間氣溫進一步下降。市場憧憬美國將達成新一輪刺激經濟方案，隔晚美股向上，三大指數齊創收市新高。雖然疫苗使用後，有過敏及不良反應現象，但傳聞中9000億美元刺激方案，足以使小企業及受疫情打擊嚴重的行業渡過難關，尤其考慮到疫情最快可能喺明年第二季結束，支持美股繼續做好。不過喺疫情反覆下，美國就業市場復甦受挫，當地上周首次申領失業救濟人數連升兩周至88.5萬人，超過市場預期，亦創9月初以嚟高位。不過市場相信聯儲局喺一段時間內會為市場提供重大支持，美股樂觀情緒依然。
至於港股ADR跟夜期此起彼落，今日又係周末前夕，而今晚美股四重期結算，估計恒指變化唔會太大，暫時仍然喺26500水平上落。美國聯儲局結束今年最後一次議息會議，維持貼近零息並修訂政策指引，承諾更長時間買債。自今年初疫情爆發以嚟，聯儲局大舉放水，令美股自3月低位持續反彈，近日更屢創新高，唔少缸邊友開始擔心美股估值會否過高，不過聯儲局主席鮑爺則大派定心丸，認為低息有助合理化股市上漲。
鮑爺喺議息後記者會表示，相對於無風險回報率，即美債孳息，股票估值其實又唔算太高。事實上，標指盈利跟股價比率較10年期美債孳息高2.5個百分點，這個被視為「聯儲局模型」嘅差價，遠高於科網泡沫爆破前水平；按相同標準衡量，當年債券收益遠高於股票。不過就PE嚟睇，目前標指PE已達29倍，跟1999年科網股熱潮30倍PE相當接近。鮑爺則解釋PE係就係高，只係考慮到10年期美債孳息將持續低於歷史水平，令PE變得唔係咁重要。雖然企業槓桿水平高企，但利息開支低企，違約跟降級嘅情況相對以往有所減少。鮑爺亦強調聯儲局會繼續監察資產價格，暫時未見到任何風險
其實美股目前PE高企，係反映明年企業業績大幅反彈，尤其喺貨幣寛鬆政策下，市場資金充裕，並湧入股票市場。隨住嚟緊一年肺炎疫苗廣泛使用，經濟活動亦將會較今年活躍，企業盈利有望回升，美股將可延續升勢。作為全球股市火車頭，只要美股生生性性，環球股市亦有運行，港股當然亦唔例外。
不過市場總有一批長期唱淡，開口埋口提住股災將至嘅人，古天后對於呢啲長期淡友嘅危言聳聽，只能一笑置之。長期睇淡從來唔入場買股，錯失資產增長機會，簡單啲睇雖然十年八載就出現一次所謂股災，但每次股災都係急且快，而喺近年資訊發達及科技進步下，股災過後復原時間持續縮短。長期淡友可能十年捕捉到一次大跌市，但其餘九成九時間，睇住股市不斷升值，只有望其項背，幾時都係做好友有着數。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。