聯儲局雖轉鷹 市場未見risk off
6月22日，多雲，有雨及狂風雷暴，雷暴警告生效。噚晚行雷行足一晚，百般滋味在心頭，至於乜嘢原因，不解釋。成晚無瞓，美股睇足全程，雖然聯儲局喺貨幣立場由鴿轉鷹，但市場對呢種態度已漸接受及消化，美股隔晚報復式反彈。三大指數上升，道指跟標指分別升1.7%及1.4%，納指則升0.8%。話就話聯儲局立場轉鷹，但睇返個10年期美債息回落至1.45%以下，實際上息率並未有向上，即係加息即使提前至2023年，都仲有成年時間有多，喺目前低息環境下，始終要買資產抗通脹，市場並未有真正risk off。
喺香港疫情漸趨穩定下，防疫措施有所放寛，同時亦講到跟內地及澳門嘅通關安排，以及外地訪港旅客檢疫措施略為放鬆，加上電子消費券發放在即，預期第三季本地經濟氣氛將有所改善。喺經濟氣氛改善下，股市照道理向好，加上半年結及維穩月將至，港股呢段時間最多係上上落落，未至於好似有啲大淡友咁講，個市要再下試27000。
政府公布新一批通脹掛鈎債券(iBond)認購及配發結果，一共收到70.91萬份有效申請，申請的債券本金總額達539.48億元，最終發行額提高至200億元。全部有效申請均可獲配發債券，最多可獲3手。55,381份認購2手或以下債券的申請，均將獲全數配發所申請的債券。餘下的653,817份申請(即認購2手以上者)，均將先獲發2手債券，並進行抽籤，其中605,727份申請將獲配發多1手債券。iBond將於本周四首掛，即係未能成功認購嘅申請金額將於呢兩日退款，資金解凍有機會重投股市掃貨，古天后認為只要美股跟A股無乜大礙，港股喺月底結算前繼續有炒作。
資金仍然係唔同板塊之間流動，汽車股及光伏股重新受捧，生化藥股更有唔股份創新高，正正反映市場風險胃納上升，只係呢批熱炒股炒上之餘係反覆向上，即係挨住條上升軌行之際，間中都會調整，要參與炒作就趁回調時候搵位上車，又或者分段買貨，急升追貨預咗有機會坐艇，但喺資金對呢幾個板塊仍留戀下，稍作調整又會從新出發，有貨喺手就適時調高止賺位坐穩，部份貨底褪出嚟短炒拉低持貨成本，繼續係應對反覆市況嘅策略。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。