SVB問題暫解決 先穩市場信心
3月13日，大致多雲，日間短暫時間有陽光，天氣乾燥。上周五美股七國咁亂，當晚公布嘅大非農表現強勁，加上SVB出事後被接管，令多間地區銀行出現擠提，引發市場信心危機，拖累美股下跌，道指跌345點；標指更失守3900支持，並跌至3861收市，納指亦跌近200點，市場出現非理性拋售，主要係市場擔心SVB事件或出現火燒連環船，2008年金融危機重演。
事實上今次SVB事件跟2008年發生嘅金融海嘯有好大分別，當時大部份銀行持有大量所謂3A債券，而呢啲所謂優質資產，實際上係由次按打包而成嘅金融產品，當樓價下跌，貸款人無法償還，呢啲債券就變得一文不值。重點係當時幾乎所有金融機構都持有呢啲產品，當時嘅銀行係因為持有大量爛資產，資產大幅貶值後，導致流動性不足。
而今次SVB則只係個別例子，SVB出現流動性不足，主要係因為管理問題多於資產真正惡化。自2020年疫情爆發後，好多初創企業取得融資，令手上現水大增，呢啲資就流入去SVB變成存款，SVB嘅存款由當時500億左右美元，短短兩年間急升至2000億元之上，存款大幅增加，而息率有因為疫情繼續QE而低迷，管理層為咗賺取更大息差，將存款資金投入10年期MBS。
不過至去年加息周期開始，初創企業再無法成功融資，更不斷需要燒錢，就將本來存放於銀行嘅存款提走，就過去一個星期，從銀行流出嘅現金高達460億美元，SVB手上現金緊拙，為應府提款需要，無奈出售手上優質MBS資產套現，而過去一年息口向上令價價下跌，因此尸SVB喺售賣呢啲資產後出現虧損，股東資本輸到渣到無，就需要股東供股，引發市場恐慌。
而剛剛最近消息係，美國政底已承諾保障存戶，為銀行提供資金應付提款需要，但勍已表示唔會接手SVB，呢個做法係保存款，唔救銀行，但都叫可以穩住市場信心。政府成立一個基金，以SVB手上嘅MBS作為抵押，貸款250億美元畀SVB，挽救存戶對銀行信心，市面上唔再見擠提，就唔會再出現流動性問題。睇返SVB手上嘅資產質素其實唔差，當擠提問題解決，SVB透過出售資產以及將存客分流至其他銀行，存戶能保住存款，危機料可化解，但SVB嘅股東毫無疑問要承擔損失。
經過SVB以及地區銀行發生擠提，斷估FOMC已唔夠膽再隨便出口術話要大幅加息，想再透過出口術為通脹降溫已不可行，目前市場已受唔起驚嚇，睇怕聯儲局將會依據經濟數據去決定加息幅度，唔唔再有理冇理出口術。FOMC目前除咗要打擊通脹，更重要係保住金融市場穩定。估計美股可以有喘息機會，睇下今晚可以反彈幾多。
至於港股喺上周五下跌至19300-19400水平，亦係12月及1月大戶開始大手掃貨嘅起步點，而整個收集區大約係19300-20000點，呢啲水平應該有一定承接力。而上周五港股大跌605點，跌至19300水平後，成交額亦增至1664億元，扣除rebalancing嘅被動買盤230億元成交額，亦錄得超過1400億元成交，以近期淡靜嘅成交額嚟講，叫做有啲睇頭。不過入場嘅資金係長線投資，抑或純博周末期間美國政府出手救SVB，只献短線反彈，暫時亦係未知數。港股一日未見有新貣金流入，繼續塘水滾塘魚，港股都難成大器。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。